ខេត្តកំពង់ធំ៖ រឿងកាន់តែអូសបន្លាយ ឆ្ងាយទៅៗ ករណី ចុះបង្រ្កាបទីតាំងមាន់ជល់អនឡាញ ដែលបណ្តាលឱ្យឈ្មោះ សួង ឌ័ន បានស្លាប់ បន្ទាប់ពីក្រុមប៉េអិម បានចុះទៅឃាត់ខ្លួនគាត់ ហើយបានសង្កត់កគាត់រហូតដកដង្ហើមមិនចេញ។
សូមបញ្ជាក់ថា លោក សួង ឌ័ន មានតួនាទីជា អនុប្រធានភូមិរូង បានស្លាប់ក្នុងពេលកម្លាំងកងរាជអាវុធហត្ថ ចុះទៅឃាត់ខ្លួនលោក និងអ្នកកំពុងលេងល្បែង ឡូតូ មាន់ជល់អនឡាញ កាលពីថ្ងៃទី៧ សីហា ស្ថិតនៅក្នុងភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ។
ការស្លាប់ របស់ លោក សួង ឌ័ន ធ្វើឱ្យក្រុមគ្រួសារសព និងអ្នកភូមិ មិនទទួលយកលទ្ធផលកោសលវិច័យរបស់កម្លាំងសមត្ថកិច្ច ដែលថា លោក សួង ឌ័ន បានស្លាប់ដោយសារជំងឺបេះដូង ។
ចំណែកឯ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានប្រាប់មកទីភ្នាក់ងារសារព័ត៌មានក្នុងស្រុកថា÷ លោកបានបញ្ជាឱ្យផ្អាកការងារ មន្ត្រីពាក់ព័ន្ធដែលចុះទៅឃាត់ខ្លួនជនរងគ្រោះស្ថិតនៅក្នុងបន្ទាយរួចហើយ ដើម្បីរង់ចាំការស៊ើបអង្កេត។ លោក សៅ សុខា ក៏សម្រេចបង្កើតគណៈកម្មការចំពោះកិច្ច ឱ្យចុះស្រាវជ្រាវជាបន្ទាន់ដែរ ដោយ លោក សុំឱ្យមេបញ្ជាការអាវុធហត្ថខេត្តកំពង់ធំ យកចិត្តទុកដាក់ធ្វើកិច្ចការងារនេះ ជាមួយក្រុមការងារ ដែលចុះទៅ ដោយម៉ឺងម៉ាត់បំផុត គឺមិនអាចអត់ឱនឱ្យបានទេ សាធារណៈមតិគេប្រកាស គេផ្សាយពេញមួយពិភពលោក ៕
