កម្លាំងសមត្ថកិច្ចនគរបាលខេត្តស្ទឹងត្រែង សហការជាមួយកម្លាំងមន្ទីរប្រឆាំងបទល្មើសគ្រឿងញៀន(ក៩) បង្ក្រាបករណីដឹកជញ្ជូនដោយខុសច្បាប់នូវសារធាតុញៀនមួយករណី កាលពីថ្ងៃទី២៥ ខែឧសភា ឆ្នាំ២០២៤ វេលាម៉ោង០៦និង៣០នាទីព្រឹក ស្ថិតនៅចំណុចវាលព្រីង ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង ។
ក្រោយការឃាត់ខ្លួនក្រុមជនសង្ស័យ កម្លាំងសមត្ថកិច្ចបានត្រួតពិនិត្យលើរថយន្តស៊េរីទំនើបទាំងនោះ ក៏បានប្រទះឃើញគ្រឿងញៀនជាច្រើនសន្ធឹកសន្ធាប់ រួមមានវិទ្យុទាក់ទង៣គ្រឿង និងគ្រាប់បែកដៃ២គ្រាប់ផងដែរ ។
មន្ត្រីសមត្ថកិច្ចក្នុងប្រតិបត្តិការខាងលើឲ្យដឹងថា សមត្ថកិច្ចបានឃាត់ខ្លួនជនជាតិថៃចំនួន៣នាក់ និងខ្មែរម្នាក់ វត្ថុតាងចាប់យករួមមាន៖ ថ្នាំញៀនប្រភេទមេតំហ្វេតាមីន(ice) ចំនួន២២៥ដុំ ស្មើ២២៥គីឡូក្រាមនិង២៥៣ក្រាម ប្រភេទកេតាមីនចំនួន៣២ដុំ ស្មើ៣១គីឡូក្រាមនិង៩២៣.២ក្រាម ។ ដូច្នេះថ្នាំញៀនទម្ងន់សរុប២៥៧គីឡូក្រាម និង១៧៦.២ក្រាម ។
