សម្តេចពិជ័យសេនា ទៀ បាញ់ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសមយុទ្ធនាគមាស កម្ពុជា-ចិន ២០២៣ ធ្វើឡើងនៅមជ្ឈមណ្ឌលហ្វឹកហ្វឺនកងរាជអាវុធហត្ថលើផ្ទៃប្រទេស (ភ្នំជុំសែនរីករាយ) ស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង
នាថ្ងៃទី០៥ ខែមេសា ឆ្នាំ២០២៣ នេះ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសមយុទ្ធនាគមាសកម្ពុជា-ចិន ២០២៣ ធ្វើឡើងនៅមជ្ឈមណ្ឌលហ្វឹកហ្វឺនកងរាជអាវុធហត្ថលើផ្ទៃប្រទេស (ភ្នំជុំសែនរីករាយ) ស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង ក្រោមប្រធានបទ «ប្រតិបត្តិការការពារ សន្តិសុខ ក្នុងព្រឹត្តិការណ៍ធំៗ និងការជួយសង្គ្រោះមនុស្សធម៌ នៃកងទ័ពប្រទេសទាំងពីរកម្ពុជា-ចិន» ។
ក្នុងឱកាសនោះសម្ដេចពិជ័យសេនា ទៀ បាញ់ បានថ្លែងថា ការធ្វើសមយុទ្ធរួមគ្នារវាងកងទ័ពកម្ពុជា និងចិននាពេលនេះ គឺបានបង្ហាញដល់ពិភពលោកឱ្យកាន់តែច្បាស់បន្ថែមទៀតថា«មិត្តដែកថែប»រវាងកម្ពុជា-ចិនមិនអាចបំបែកបំបាក់បាននោះឡើយ ខណៈការធ្វើសមយុទ្ធនេះ ដើម្បីបង្កើនកិច្ចសហប្រតិបត្តិការជាមួយគ្នាឲ្យកាន់តែជិតស្និទ្ធថែមទៀត សម្រាប់គាំទ្រដល់សន្តិសុខក្នុងតំបន់ និងសកលលោកផងដែរ។
សម្តេចពិជ័យសេនា ទៀ បាញ់ បានលើកឡើងផងដែរថា សមយុទ្ធ«នាគមាសឆ្នាំ២០២៣»រវាងកងទ័ពកម្ពុជា និងចិនលើកទី៥នេះ បានផ្តល់ឱកាសដល់កងទ័ពទាំងពីរទទួលបានការផ្លាស់ប្តូរបន្ថែម នូវចំណេះដឹងបទពិសោធន៍ រៀនសូត្រពីគ្នាទៅវិញទៅមក និងបង្កើនកិច្ចសហប្រតិបត្តិការជាមួយគ្នា កាន់តែជិតស្និទ្ធថែមទៀតសម្រាប់គាំទ្រដល់សន្តិសុខក្នុងតំបន់ និងសកលលោក។
ជាមួយគ្នានេះ សម្តេចពិជ័យសេនា បានថ្លែងបញ្ជាក់ថា តាមរយៈសមយុទ្ធរួមគ្នាជាមួយកងទ័ពចិនក្នុងរយៈពេល២០ថ្ងៃមកនេះ កងទ័ពកម្ពុជាក៏ទទួលបាននូវបទពិសោធន៍ និងចំណេះដឹងថ្មីៗថែមទៀត ដូចជាការចល័តកងកម្លាំង ការដោះស្រាយជាយថាហេតុការរុករកបោសសំអាតមីន និងយុទ្ធភ័ណ្ឌមិនទាន់ផ្ទុះ ប្រតិបត្តិការមនុស្សធម៌ ការដោះស្រាយជំងឺឆ្លង និងកិច្ចការសង្គមមួយចំនួនទៀត និងបានរួមចំណែកយ៉ាងសំខាន់ ក្នុងការត្រៀមរៀបចំកម្លាំងសម្រាប់ចូលរួមព្រឹត្តិការណ៍ SEA Games-ASEAN Para Games 2023 នាពេលដ៏ខ្លីខាងមុខទៀតផងដែរ ៕
